Policia e Tiranës mësohet se ka dhunur para ndeshjes Partizani-Teuta edhe dhëndrin e trajnerit të Partizanit, Sulejman Starova. Ndeshja që u luajt në fundjavë u shoqërua me problematika në fillim të saj, ku policia nuk lejonte tifozët e kuq të futeshin në stadium pa karta identiteti. Gjatë këtij momenti Policia ka dhunuar pa shkak shtetasin Gent Malaj, që është dhëndri i trajnerit të Partizanit i cili edhe ky ishte në radhë për të hyrë në stadium, por ndërsa ka mësuar se nuk mund të hyhet pa kartë identiteti në stadium është drejtuar për ta marrë në makinën e tij, aty ku policët i kanë vendosur një kapuç në kokë dhe e kanë dhunuar barbarisht pa i dhënë shkak. Më pas Malaj ka përfunduar në Polici, ndërkohë që menjëherë pas ngjarjes Malaj ka ngritur padi ndaj dhunës policore. I pajisur me pasaportë italiane, Malaj ka njoftuar edhe ambasadën e tij për dhunën që ka pësuar, si edhe ka kërkuar pamjet e televizioneve që janë gjendur në atë moment në vendngjarje, me qëllim për të argumentuar që është ndaluar dhe dhunuar me të padrejtë nga policia.
