Darka e mbrëmshme mes kryeministrit dhe kryetarit të Parlamentit duket se nuk ka kaluar aq pa debate sa u përpoqën sot të dy palët ta përshkruanin. Veç verës që është konsumuar, në tavolinë është folur edhe për mundësinë e dorëheqjes.
Të paktën kështu bëjnë të ditur burime të opinion.al, sipas të cilave, Meta i ka parashtruar Ramës mundësinë e dorëheqjes së të dyve për shkak se situata e protestës së opozitës mund të acarohet dhe të sjellë të papritura.
Të dy bashkëbiseduesit kanë qenë të sigurt për numrin e votave që e mban qeverinë në këmbë edhe me protëstën poshtë zyrave të kryeministrit, por ky i fundit mësohet të ketë këmbëngulur në mosdorëheqjen në asnjë rast.
Burime të besueshme konfirmojnë se pjesa më e “nxehtë” e bisedës mes Ramës dhe Metës ka qenë pikërisht oferta e këtij të fundit për të plotësuar kërkesën e opozitës dhe për të shmangur përshkallëzimin e protestës.
Rama nga ana e tij, përtej këmbënguljes se nuk ka ndërmend të dorëhiqet, i ka kërkuar aleatit të tij kryesor që të “ndajë mendjen se çdo të bëjë në një situatë si kjo”.
Ndërsa Meta ka vijuar ti mëshojë faktit se sipas tij situata kërkon qetësi dhe maturi në veprime, duke qenë i qartë në pikën që destabilizimi i situatës është i dëmshëm për qeverisjen aktuale por dhe për të ardhmen politike të koalicionit./Opinion.al/
