Nga ngjarja e ndodhur para Parlamentit në Londër, një polic dhe një grua kanë humbur jetën, ndërsa më shumë se 10 persona janë plagosur, një akt që policia po e konsideron si terrorist.
Agresori me thikë, i përshkruar si një aziatik rreth të 40-ave, arriti të futej në kopshtin e Parlamentit dhe ka gjuajtur me thikë një oficer policie, përpara se të qëllohej për vdekje.
Më shumë se 10 persona thuhet se janë goditur me automjet “4×4” në urën “Westminster”, që raportohet se drejtohej drejt turmës së këmbësorëve dhe çiklistëve. Tri trupa dukeshin qartë të shtrirë jashtë Parlamentit, ndërsa ndërtesa është rrethuar dhe mbyllur me urgjencë.
“Një polic është goditur me thikë jashtë Dhomave të Parlamentit në qendër të Londrës”, ka thënë David Lidington, Lideri i Dhomës së Përfaqësuesve.
Ai u tha deputetëve se “sulmuesi i dyshuar është qëlluar nga policia pas një incidenti të rëndë”.
Nga ana tjetër kryeministra Theresa May është parë duke u transportuar me urgjencë në një makinë Jaguar. Sipas burimeve ajo nuk ka pësuar asgjë thjeshtë po largohet nga vendngjarja.
Stafit brenda Parlamentit i është kërkuar të qëndrojë në godinë derisa zona të jetë e sigurt. BBC raporton për një burrë të qëlluar me armë.
“Janë dëgjuar tre ose katër krisma.”
Ndërsa redaktori politik i “The Independent”, Tom Peck ka thënë se ka dëgjuar britma dhe ulërima të mëdha para se të dëgjonte të shkrepurat e armës.
Situata ende mbetet e paqartë./opinion.al
