TIRANE- Sali Berisha përjashtohet nga parlamenti për 10 ditë. Kjo ndodh për herë të parë në gjithë karrierën e tij politike dhe parlamentare. Vendimi sapo u mor nga Byroja parlamentare. Kjo do të thotë se për dy javë, lideri historik i të djathtëve nuk do të mundet tu flasë shqiptarëve nga foltorja e Parlamentit.
Masa ndaj tij vjen pas deklaratës së djeshme në Parlament ku u bëri thirrje shqiptarëve të armatosen se përballë kemi një qeveri të inkriminuar. Ai më vonë sqaroi se bëhet fjalë për ndryshimin e legjistalicionit, pra që të ndryshojë ligji i armëve dhe se shqiptarët të pajisen sipas ligjit me armë.
Në një reagim pas këtij vendimi, deputeti i Partisë Demokratike, Edmond Spaho e konsideroi përjashtimin e Berishës si hakmarrje të mazhorancës. Ai tha se u shfrytëzua mekanizmi i votës, ndërsa theksoi se Berisha denoncoi kanosjen e akademikëve.
Sipas Spahos, kjo shumicë është e lidhur me krimin dhe me këtë veprim kërkojnë të largojnë vëmendjen nga këto lidhje.
Ndërsa deputeti socialist Taulant Balla tha se vendimi për Berishën është më i ashpri, që parashikon rregullorja. Ai u shpreh se Berisha s’mund të jetë i paprekshëm dhe i kërkoi prokuroria të nisë hetimet.
