Kryeministri i Shqipërisë, Edi Rama, sot, gjatë fjalës në Asamblenë e Partisë Socialiste ka shpallur qeverinë e re të vendit, pas fitores së zgjedhjeve më 25 qershor.
Edi Rama dhe Niko Peleshi në cilësinë e kryetarit të grupit të punës për reformën në administratë, prezantuan ditën e sotme formatin e qeverisë së re.
Prezantimin, Rama e nisi nga kryetari i Kuvendit të Shqipërisë, post të cilin për katër vitet e ardhshme do e mbajë Gramoz Ruçi. Sipas tij, emri i Ruçit është garancia e parë e kësaj qeverisje. Më pas, publik nga kryeministri u bë edhe emri i kryetarit të Grupit Parlamentar të PS, që për katër vitet e ardhshme do përfaqësohet nga Taulant Balla.
Kryeministri Edi Rama tha se do të ndryshojë struktura e qeverisë së re. Ajo do ketë 11 ministri dhe dy ministra Shteti, përbërja e kësaj qeverie do ndahet me 50 për qind burra dhe 50 për qind gra.
“Struktura do ndryshojë, mënyra e funksionimit do ndryshoje. Eksperienca e këtyre katër viteve dhe defektet e mandatit të parë por edhe sfidat e mandatit të ri çojnë në përfundim se na duhet një qeveri më e vogël dhe më bashkëpunuese me partinë”, tha Rama.
Ai zbuloi se anëtarët e kabinetit dhe drejtuesit e partisë do punojnë me një kalendar të përbashkët.
“Ministrat do paraqesin planin e punës në fillim të çdo sesioni dhe në fund do bëjnë bilancin. Çdo mosrealizim të pajustifikuar do çojë në largim e çdo ministri apo ministreje”, tha Rama.
11 ministri dhe 2 ministra shteti
50% burra dhe 50% gra
Zv/ kryeministre Senida Mesi
Ministër i Shtetit për Diasporën Pandeli Majko
Ministria e Shtetit për Mbrojtjen e Sipërmarrëseve Sonila Qato
Ministria e Jashtme Ditmir Bushati
Ministria e Brendshme Fatmir Xhafaj
Ministria e Mbrojtjes Olta Xhaçka
Ministria e Drejtësisë Etilda Gjoni
Ministria e Kulturës Mirela Kumbaro
Ministria e Financave, Ekonomisë e Punës Arben Ahemtaj
Ministria e Arsimit, Sportit dhe Rinisë Lindita Nikolla
Ministria e Shëndetësisë dhe Kujdesit Social Ogerta Manastirliu
Ministria e Energjisë dhe Infrastrukturës Damian Gjiknuri
Ministër i Bujqësisë dhe Zhvillimit Rural Niko Peleshi
Ministria e Turizmit dhe Mjedisit Blendi Klosi
Më herët, gjatë fjalës së tij, kryeministri theksoi se kërkon të jetë fare i qartë, bashkëqeverisja me njerëzit e zakonshëm nuk është togfjalësh propagandistik, është një sfidë reale për të ndërtuar dhe vënë në funksionim një koalicion real, fillimisht në nivel qendror, të cilën në dy vite edhe në nivel vendor.
“Ky proces është baras me krijimin e një force të re politike. Jemi në fillesën e një projekti të ri politik me frymëzimin nga poshtë dhe me reflektimin tonë nga lart. Shqipërisë i duhet, shqiptarët e duan dhe ne duam t’i japim një forcë atipike e imponuar nga nevoja e vendit, për të çuar në një stad të ri shtetin, një bashkim i domosdoshëm njerëzish nga të gjitha shtresat për të mundësuar arritjen e këtij stadi të ri”, tha Rama.
Kryeministri më tej, bëri me dije se ky është mandati më i vështirë që kur ai ka marrë këtë detyrë. Sipas tij, fati i kësaj supersfide varet nëse do arrihet të mbrohet ky super-pushtet nga vetvetja.
LIVE-fjala e kryeministrit Edi Rama në Asamblenë e PS-së
Pse u larguam nga aleatët tanë?
Rama: Urgjenca e ndryshimit na detyroi të largohemi prerë nga aleatët dhe u mishërua në flamurin kuq e zi të ndryshimit.
Urgjenca e ndryshimit na mundësoi ne privilegjin e qeverisjes të vetëm në 4 vitet e ardhshme.
Urgjenca e ndryshimit është tamam ajo që i mundi të gjithë ata që u bënë bashkë mbi tokë dhe nën tokë për ta ndërprerë rrugën tonë të reformamve.
Njerëzit e zakonshëm e bënë, ata e fituan betejën zgjedhore për ne.
Tani është radha jonë për të bërë Shqipërinë që duam, punë, mirëqënies, për ata. Ky është mandati më i vështirë dhe që kur unë jam në këtë detyrë.
Për t’ia dalë këtij mandati, duhet që fuqinë tonë numerike në parlament të mos e shkëpusim nga fuqia politike. Duhet ta rrisim fuqinë numerike dhe politike dhe t’i japim jetë, vendim pas vendimi, një force të re qeverisëse.
