Shefja e Politikës së Jashtme në BE, Federica Mogherini dhe komisioneri për Zgjerimin, Johanes Hahn kanë reaguar përmes një deklarate të përbashkët lidhur me zhvillimet e fundit në Shqipëri. Ata i kanë bërë sërish thirrje opozitës që të rikthehet në Kuvend dhe të marrë pjesë në zgjedhje.
“Jemi të keqardhur për bojkotin e parlamentit dhe faktin që opozita nuk është regjistruar ende për të marrë pjesë në zgjedhje. Debati politik duhet të zhvillohet brenda parlamentit sipas praktikës demokratik dhe jo jashtë tij. Qytetarët dëshirojnë udhëheqës të përgjegjshëm”, thuhet në deklaratë.
Por përveç inkurajimit për mbajtjen e zgjedhjeve në përputhje me standardet ndërkombëtare, Mogherini dhe Hahn vënë theksin te reforma në drejtësi.
“Në mënyrë të veçantë, reforma e domosdoshme në drejtësi ka marrë një tjetër goditje. I bëjmë thirrje të gjitha partive të plotësojnë institucionet e vettingut. Sulmi ndaj reformës në drejtësi në vend që të sigurosh zbatimin e vettingut me monitorim të afërt të Operacionit Ndërkombëtar të Monitorimit, dëmton të tashmen dhe të ardhmen e Shqipërisë. Ne presim që deputetët do të tregojnë përgjegjshmëri dhe kapacitet të veprojnë brenda kornizës insitucionele ligjore demokratike dhe të qëndrojnë në krah të popullit shqiptar, i cili kërkon zbatimin e reformës në drejtësi si një hap i rëndësishëm që vendi t’i bashkohet Bashkimit Europian”, përfundon deklarata.
