E fundit/ Del ekspertiza mjeko-ligjore, ja çfarë u gjend në kokën e të riut

Ka dalë ekspertiza e vdekjes së 16 vjeçarit K.GJ, në lagjen Sanxhak në Laç, natën e ndërrimit të viteve. Sipas ekspertëve mjeko-ligjor, në kokën e të riut u gjend një predhë plumbi, çka përforcon bindjen se i riu nuk u vra nga fishekzjarret por nga një plumb qorr i qitur nga një armë zjarri. K.GJ u gjet pa jetë vetëm pak minuta sapo kishte ardhur viti 2018. Ai ishte ngjitur në taracën e shtëpisë për të hedhur fishekzjarre por më pas u gjend nga të afërmit pa ndjenja, me një plagë tejshpuese në kokë. Ditën e sotme Policia e Kurbinit ka ndaluar tre shtetas të afërm me njëri-tjetrin, të cilët mësohet se kanë qëlluar me armë zjarri gjatë mbrëmjes së ndërrimit të vitit duke lëvizur me një makinë tip Benz, pranë vendit ku ndodhi edhe vdekja e të riut.