Policia e Tiranës ka arritur të kapë, pas dy orësh kërkime, Marjan Levantin, autorin e plagosjes së familjarëve të ish-gruas.
Levanti plagosi me thikë, mbrëmjen e sotme, 23 dhejtor, ish-kunatin, ish-vjehrrën dhe ish-vjehrrin për shkak të një konflikti në lidhje me ndarjen e pasurisë pas procesit të divorcit, që përfundoi pak muaj më parë.
Ngjarja e rëndë ka ndodhur në zonën e Unazës së Re në Tiranë. Autori i krimit, ka marrë thikën duke lënë të plagosur ish-vjehrrin dhe më pas ish-kunatin, në përleshje e sipër, mësohet të jetë lënduar dhe ish-vjehrra.
Marjan Levanti nuk është një emër i panjohur për policinë. Tre vjet më parë, është dënuar për plagosjen e një 18-vjeçari dhe për këtë krim, Levanti ka kryer dy vjet burg, deri në vitin 2015.
Po në të njëjtin vit, 18.03.2013 në lagjen Unaza e Re, Tiranë, Levanti ka plagosur rëndë Zef Gjovalin Gjinin, ndërsa një muaj më vonë i është vrarë vëllai, ish-boksieri Adrian Levanti.
Në atë kohë, policia hodhi dyshime se ish-boksieri Levanti është vrarë për hakmarrje.
Mësohet se divorci për Marjan Levantin, ka ardhur pas kohës së lirimit të tij nga burgu.
