Arrestohet autori i masakrës së Shkodrës. Miklovan Parubi u kap afër banesës së tij, njoftoi policia e Shkodrës. Ai vrau dy persona dhe plagosi katër të tjerë mbrëmjen e së hënës në një lokal në fshatin Dajç, pas një sherri banal, ku kishte humbur në lojën e bixhozit.
“Nga puna e pandërprerë e drejtorisë vendore të policisë së Shkodrës u bë e mundur të kapet autori i dyshuar i ngjarjes së Dajçit. Miklovan Parubi u gjet në afërsi të banesës së tij”, thuhet në njoftimin e policisë.
Ngjarja ndodhi mbrëmjen e së hënës në një lokal në kryqëzimin e fshatit Dajç rreth orës 22:40. Miklovan Parubi, që njihet në zonë si person me probleme mendore dhe përdorues droge është përfshirë në një sherr me bashkëfshatarin e tij, Ndok Marku.
Dyshohet se ata kanë qenë të alkoolizuar dhe kanë debatuar për një lojë bixhozi. Në gjaknxehtësi e sipër, autori është ngritur nga tavolina për tu kthyer pas disa minutash me automatik në krahë. Pronari i lokalit, Arjet Saiti është përpjekur ta ndalojë por mbeti viktimë në këtë ngjarje. Autori ka qëlluar parreshtur drejt tavolinave dhe për pasojë gjeti vdekjen edhe Gacalin Kopshti 30 vjeç. Të plagosur, mbetën, shenjestra Ndok Marku si dhe Vinçens Kopshti, Aleks Prendi dhe Kitas Molla.
Nga deshmitë e para në polici të familjarëve thuhet se Gacalin Kopshti është vrarë aksidentalisht, pasi nuk ishte në tavolinë me autorin dhe personat e tjerë.
Gjithashtu në lidhje me këtë ngjarje është arrestuar më herët edhe Marçel Shipijati 30-vjeç. Sipas policisë, ky person ka ndihmuar autorin të sigurojë armën e krimit dhe e ka ndihmuar atë të largohet me shpejtësi nga vendi i ngjarjes. /Opinion.al
*Në foto Miklovan Parubi
