Ylli ndërkombëtar i futbollit, Cristiano Ronaldo ka kaluar disa ditë të vështira pasi e ëma, Dolores Aveiro, u dërgua me urgjencë në spital për shkak të një goditjeje në tru.
Megjithatë, siç njofton vetë Ronaldo gjendja e saj tashmë është stabilizuar. Teksa ka falenderuar fansat për mbështetjen, futbollisti ka kërkuar privatësi për të dhe familjen e tij.
“Faleminderit për të gjitha mesazhet dhe mbështetjen për nënën time. Ajo është stabilizuar dhe po kurohet në spital. Unë dhe familja ime dëshirojmë të falenderojmë ekipin e mjekëve që u kujdesën për rastin e saj dhe me mirësjellje ju kërkojmë të na jepni pak privatësi këtë periudhë.”- shkruan futbollisti.
Nëna e Ronaldos, me të cilën futbollisti ka treguar edhe më herët se ka një lidhje të fortë, u shtrua në një spital privat në ishullin e saj të lindjes, Madeira, rreth orës 5 të mëngjesit të ditës së djeshme. Sipas mediave të huaja, ajo kishte pësuar një goditje të shkaktuar nga një mpiksje gjaku në njërën prej enëve që çon gjakun në tru.
Kujtojmë që kjo nuk është beteja e parë që Aveiro tejkalon me sukses sprova të vështira me sëmundje të ndryshme. Vitin e kaluar, ajo njoftoi se kishte fituar luftën me kancerin e gjirit./Opinion.al
