Shkëlzen Velaj i cili u ekzekutua mbrëmë në qytetin e Vlorës është vëllai i Ardi Velajt, i cili mbeti i vrarë në ngjarjen e rëndë të vitit 2015, e cila ka marrë emrin masakra e Çoles. Bashkë me vëllanë e tij u vranë dhe dy të tjerë, Akil Hasanaj dhe Albi Limaj.
Masakra ndodhi më 7 prill 2015 në lagjen “Çole” të Vlorës. Ajo e ka zanafillën në një sherr të nisur në një kazino pranë portit të qytetit bregdetar. Konflikti mes grupeve të të rinjve çoi në përplasjen e armatosur në lokal ku mbetën të vrarë 3 persona dhe u plagos një i katërt.
35-vjeçari, Shkëlzen Velaj, rreth orës 23:55, në lagjen “24 Maji” u vra më armë zjarri në hyrje të pallatit ku banonte. Sipas informacioneve ai po kthehej në shtëpi, kur ka pikasur që disa persona ishin duke e ndjekur.
Shkëlzen Velaj ka tentuar të dalë nga makinë dhe është larguar me vrap për në pallatin e tij, por u qëllua me breshëri armësh. Fillimisht 35-vjeçari mbeti i plagosur, por ndërroi jetë disa minuta më vonë në spital për shkak të plagëve të rënda./Opinion.al
