Parlamenti Europian ka miratuar ndryshimet për të drejtën e autorit të cilat do të kenë ndikim te natyra informative e Internetit.
Përmes debateve, ky projektligj kaloi me 348 vota në favor, 274 kundër dhe 36 abstenime. Pas ndryshimeve të miratuara në Parlamentin Europian, kompanitë e rrjeteve sociale dhe platformat e tjera informative do të jenë të detyruara që të botojnë vetëm materiale në përputhje me rregullat e kopirajtit.
Në botimet të cilat do të përcjellen prej tyre, përfshihen marrëveshje kundrejt pagesës ose jo me autorët, artistët dhe botuesit e tjerë përpara përdorimit të materialeve të tyre origjinale; dhe që shërbimet informative jofitimprurëse apo enciklopedike, si Uikipedia, t’u referohen materialeve dhe burimeve vetëm për qëllime edukative dhe kërkimore.
Sipas europarlamentarëve, ndryshimet nuk kanë për qëllim censurimin e informacionit, por respektimin e rreptë të prodhuesve të çdolloj informacioni dhe ruajtjen e trashëgimisë kulturore evropiane.
Përpara votimit, në fundjavë mbështetësit dhe kundërshtarët e projektligjit e shfaqën revoltën e tyre me protesta, përkatësisht në Gjermani, Austri, Portugali, ndërsa disa gazeta në Poloni u hapën me faqen e parë bosh në shenjë përkrahjeje për ligjin./ Opinion.al E.Xh.
