Kryeministri Edi Rama ka folur për rrjetin ndërkombëtar të televizionit polak, TVP World lidhur me procesin e zgjedhjeve parlamentare të 11 Majit.
Gjatë fjalës së tij, ai ka thënë se këto ishin zgjedhjet më të mira të realizuara ndonjëherë përsa i përket qetësisë dhe maturimit.
Më tej, Rama ka komentuar edhe kritikat nga vëzhguesit ndërkombëtarë për zgjedhjet, ku theksoi se e marrin kriticizmin në këtë raport me vullnetin e mirë për të parë ato që janë shqetësime reale.
“Raportet janë krijuar që të jenë të balancuar, që të pasqyrojnë çdo anë madje edhe pretendime. Raportet po ashtu janë bërë që tëkorrigjohen gjatë rrugës pasi kemi të bëjmë me një raport paraprak. Ne e marrim kriticizmin në këtë raport me vullnetin e mirë për të parë ato që janë shqetësime reale.
Unë mendoj se këto ishin zgjedhjet më të mira të realizuara ndonjëherë përsa i përket qetësisë dhe maturimit. Përsa i përket përdorimit të burimeve publike ky raport është shumë larg realitetit për arsyen e vetme sepse ne kemi një kornizë strikte ligjore.
Besoj se jemi i vetmi vend ku qeveria nuk lejohet që të marrë vendime katër muaj para ditës së zgjedhjeve. Nga ana tjetër ne e dimë që jemi larg të qenit perfekt. Përmirësimi është mantra jonë: ne duhet të përmirësohemi, jo të fajësojmë.”
Po ashtu ai ka folur për mbështetjen që i ka dhënë SPAK-ut, duke e konsideruar si një nga gjërat më të mira të bëra në Shqipëri.
“SPAK është një nga gjërat më të mira që është bërë edhe me vullnetin tonë për të funksionuar si shtetet e tjera evropiane. Kemi bërë diçka që nuk kishte ndodhur më parë, ndarja e plotë e pushteteve dhe largimi i duarve të politikës nga sitemi gjyqësor.
Për herë të parë, Shqipëria po përjeton diçka që quhet barazi përpara ligjit. Nuk ka qenë kurrë kështu. Duhet ta bëjmë të pakthyeshëm dhe kjo është arsyeja pse duhet të hyjmë në Bashkimin Evropian”, është shprehur Rama.
Sipas tij, Shqipëria është me fat për hapjen e dyerve të Bashkimit Evropian.
Për këtë arsye ai thotë se duhet të bëjnë më të mirën për të përfituar nga ky moment.
“Për t’u integruar në BE ne nuk na duhet që të shpikim ndonjë gjë, duhet që të realizojmë të gjtha kushtet dhe standardet që na kërkohen. Negociatat po vijojnë, është diçka madhështore pasi Evropa ka hapur dyert për ne. Duhet të përfitojmë nga kjo mundësi sepse ndoshta kjo derë nuk do të qëndrojë e hapur përgjithnjë.
Të bëjmë më të mirën për të përfituar nga ky moment. Në të kundërt në fund të përfundojme si Afganistani, Iraku ose si shtete të tjera që kanë dështuar sepse nuk kishin asistencen e BE-se një vend ku nuk kemi patur traditë të një shteti demokratik. Duam të ndërtojmë këtu një shtet ku instucionet funksionojnë kjo mbështetje është bekim për ne”, shprehet Kryeministri Rama.
