Është zbardhur dëshmia e 56-vjeçarit Shefqet Lika të arrestuar ditën e djeshme në Kamëz pasi fshehu vetëvrasjen e bashkëshortes Shahe Lika.
Sipas Abc News, Lika ka deklaruar para policisë se ka pasur frikë të raportojë për vetëvrasjen e bashkëshortes pasi sipas tij familjarët e saj nuk do ta besonin.
Ndër të tjera, Lika tha se prej kohësh ka qenë akuzuar nga familjarët e bashkëshortes për dhunë ndaj kësaj të fundit dhe se shumë herë e kanë paralajmëruar se do ta denonconin. Pas vdekjes së Shahe Likës, familjarët e saj kanë kërkuar ekspertizë të trupit të pajetë. Pas kryerjes së ekzpertizës rezultoi se 55-vjeçarja ishte vetëvarur.
Sakaq, Shefqet Lika akuzohet për veprat penale, “Shkaktimi i vetëvrasjes” dhe “Veprime që pengojnë zbulimin e së vërtetës”.
Sipas policisë, midis çiftit prej vitesh ka pasur konflikte të vazhdueshme, ndërsa viktima është përballur me dhunë sistematike nga bashkëshorti i saj. Po ashtu, të njëjtat burime bëjnë me dije se 55-vjeçarja ishte larguar nga banesa dhe kishte shkuar tek e motra për të jetuar, ndërsa u kthye në shtëpi një ditë para se të kryente aktin e vetëvrasjes.
Mendohet se viktima e ka marrë këtë vendim për shkak të dhunës, ndërsa 56-vjeçari ishte konsumator i pijeve alkoolike.
Gjithashtu, mësohet se fëmijët e tyre ishin jashtë shtetit dhe pas mbërritjes në shtëpi të hënën kanë pasur debate me familjarët e të atit. 55-vjeçarja u përcoll për në banesën e fundit nga familjarët e saj, ndërsa bëhet me dije se fëmijët janë larguar nga banesa e të atit./Opinion.al
