Një nga diamantet më të mëdhenj në botë është gjetur në minierën Letseng në Lesoto, një vend i vogël i rrethuar nga Afrika e Jugut. Diamanti u gjet nga kompania britanike e minierave Gem Diamonds dhe mund të vlejë deri në 40 milionë dollarë.
Sipas Deutsche Welle minatori i diamanteve zbuloi gurin e çmuar në minierën Letseng dhe e përshkroi diamantin 910-karat si të “cilësisë së jashtëzakonshme”.
Lesoto është një vend i vogël me një territor të rrethuar plotësisht nga Afrika e Jugut. Ai ka një popullsi prej rreth 2 milionë banorësh. Më shumë se 40 për qind e popullatës jetojnë nën kufirin e varfërisë prej vetëm $ 1.25 në ditë.
“Që nga viti që Gem Diamonds ka mbërritur në Letseng në vitin 2006, miniera ka prodhuar disa nga diamantet më të shquara në botë, duke përfshirë “Premtimi Lesotho” 603-karat”, tha shefi ekzekutiv i Gem Diamonds, Clifford Elphick, në një deklaratë.
“Megjithatë, ky diamant i jashtëzakonshëm me cilësi të lartë është më i madhi i gjetur deri më tani … ky është një zbulim i rëndësishëm”, shtoi Elphick.
Ben Davis, një analist i minierave në Liberum Capital, tha për investitorët se diamanti mund të vlejë deri në 40 milionë dollarë (33 milionë euro).
Një diamant i ngjashëm nga Botsvana, që besohet të jetë diamanti më i madh i paprerë i gjetur në një shekull, u shit për 53 milionë dollarë në shtator 2017./tvklan.al
