Një sasi tejet e madhe droge, 10 ose 15 ton është kapur mbrëmjen e djeshme në Llakatund të Vlorës. Zëdhënësi i policisë tha droga po peshohet ende ndaj dhe të dhënat për shifrat janë paraprake.
Burime nga policia bëjnë me dije se sasia e konsiderueshme e drogës u gjet në dy banesa në fshatin Llakatund.
Gjatë aksionit u sekuestruan edhe 5 armë zjarri kallashnikov. Disa persona janë shoqëruar në lidhje me tonelatat e drogës, ndërkohë që hetimet janë duke vijuar.
Operacionin e përshëndeti edhe drejtori i Përgjithshëm i Policisë së Shtetit Haki Çako, i cili në orët e para të mëngjesit shkoi në Drejtorinë e Policisë së Vlorës dhe falenderoi uniformat blu që morën pjesë në aksion. Gjatë fjalës së tij, Çako e konsideroi luftën ndaj drogës si një prioritet të qeverisë dhe që duhet përmbushur.
Njoftimi i policisë
Mega Operacion antidrogë në të gjithë vendin. Operacione në Vlorë , Tiranë, Kavajë, Përmet , Lezhë, Elbasan, Shkodër, Krujë, Kukës etj.
Operacioni drejtohet nga Drejtori i Përgjithshëm i Policisë së Shtetit, Haki Çako .
Operacioni në Vlorë është zhvilluar nga Policia e Vlorës e mbështetur nga FNSH-ja.
Sekuestrohen në Llakatund të Vlorës një sasi disa tonëshe me lëndë narkotike Cannabis Sativa.
Sekuestrohen edhe 5 armë zjarri kallashnikov.
Lënda narkotike u gjet në dy banesa në fshatin Llakatund.
Shoqërohen në polici disa persona.
Operacioni ka vijuar edhe në Tiranë e Kavajë ku është sekuestruar një sasi e konsiderueshme lënde narkotike.
Lëndë narkotike është sekuestruar edhe në Përmet. Në këto operacione ka persona të arrestuar e të shoqëruar, ku në përfundim do jepen detaje. Ende nuk ka përfunduar peshimi total i lëndës narkotike. Operacioni vijon në disa qarqe.
