Për sulmuesin Antoine Griezmann gjithnjë ka spekulime që e bëjnë të “fluturojë” sa te një skuadër te një tjetër, por francezi vetë është i bindur të paktën për një gjë: Real Madrid nuk do të jetë destinacioni i tij i ardhshëm. Madje, ylli i Atletico Madrid-it në një intervistë të fundit ka zbuluar se ndërmjet dy klubeve madrilene ka një pakt, në bazë të cilit lojtarët e tyre nuk mund të transferohen te skuadra fqinje. “Ndihem shkëlqyeshëm tek Atletico”, – tha 25-vjeçari për “Telefoot”-in. “Është e vërtetë se dua të fitoj tituj, por nuk mund të shkoj te Real Madrid për shkak të rivalitetit. Ka edhe një pakt për këtë ndërmjet klubeve”, – shtoi ai. Padyshim, një lajm fantastik për tifozët e bardhekuqve.
Më pas, i pyetur nëse do të preferonte kalimin te një skuadër si PSG-ja, Griezmann u tregua mjaft i qartë. “Është një klub interesant, por nuk më pëlqen Ligue 1. Pëlqej La Liga-n dhe Premier League-n, por synimi im nuk është të largohem nga Atletico menjëherë”, – shpjegoi nënkampioni i dyfishtë i Evropës. Si një pretendent për “Topin e Artë”, francezi u pyet gjithashtu nëse mendon se mund ta fitojë trofeun e më të mirit në botë. “E kam synim, por Cristiano Ronaldo sapo ka fituar Ligën e Kampionëve dhe Kampionatin Evropian, kështu që e meriton. Lionel Messi gjithashtu do të vazhdojë të shënojë si çdo vit, kështu që do ta kem të vështirë”, – përfundoi Griezmann.
