Dyshohet se bashkëpunoi me një klient, pistë e re për vdekjen e Joy Ayoko

Policia e prokuroria kanë ngritur një pistë të re hetimi në lidhje me vdekjen e kenianes Joy Ayoko. Sipas Klan News hetuesit kanë dyshime se 22-vjeçarja, e cila punonte si krupiere në një kazino në Tiranë, i ka dhënë informacion për mënyrën se si të luante një lojtari, ndërsa ky i fundit kishte futur në lojë shuma të mëdha parash.
Autoritetet kanë identifikuar lojtarin në fjalë dhe pritet që të merret në pyetje nga policia. Dëshmia e tij mund të ndihmojë hetuesit për zbardhjen e dhunimit të kenianes, gjë që çoi deri në vdekjen e saj.
Ka dyshime të forta, sipas Klan News, që manovrat e kenianes dhe lojtarit të jenë zbuluar nga stafi i kazinosë dhe kjo gjë të jetë bërë shkak për ngjarjen e rëndë.
Kujtojmë që gjatë fundjavës u morën në pyetje gjashtë persona në lidhje me këtë ngjarje. Policia rimori në pyetje shoferin e kazinosë, Rodi Braçi dhe 5 persona të tjerë.
22 vjeçarja u dhunua brutalisht dhe u hodh nga kati i dytë i banesës ku jetonte në rrugën “Pandeli Evangjeli” në Tiranë në gusht të vitit 2022. Që atëherë keniania ishte në gjendje kritike dhe kishte nevojë për kujdes të specializuar neurologjik.
Pas disa muajsh, ajo u kthye në Kenia bashkë me nënën e saj, ku edhe ndërroi jetë/Opinion.al