TIRANË- Përpos një plagosje të mundshme për shkak të detyrës, po hetohet edhe për një sherr banal ku mund të jetë përfshirë gjyqtari që u plagos mbrëmë Artan Gjermeni. Ai nuk ka pranuar të bashkëpunojë në asnjë moment me policinë, duke thënë se plagosja e tij është aksidentale. Gjithsesi, burime nga policia thonë se ngjarja po hetohet.
Burimet thonë se ai është përfshirë në një sherr, që mund të jetë edhe banal, ku sulmuesi e ka qëlluar me thikë të cilën gjyqtari e ka kapur me dorë duke prerë gishtin. Ndërkohë dëmtimet në qafë dhe buzë dyshohet se janë bërë nga të goditurat.
Por pavarësisht dyshimeve Artan Gjermeni nuk pranon të japë shpjegime, duke këmbëngulur se është vrarë në garazhin e tij, ku policia nuk ka gjetur asnjë njollë gjaku.
Njolla të shumta gjaku, sipas policisë, kishte në sediljen e parë dhe pranë marsheve të makinës së gjyqtarit. Ndërsa në garazhin ku Gjermeni pretendon se u plagos aksidentalisht nuk u gjet asnjë gjurmë gjaku dhe asnjë mjet prerës.
Gjyqtari Artan Gjermeni prej më shumë se 10 viteve është gjyqtar i Gjykatës së Tiranës, ku pak vite më parë ka mbajtur detyrën edhe të anëtarit të Këshilit të Lartë të Drejtësisë.
