Ministria e Shëndetësisë ka sqaruar ndryshimin në ligjin për kujdesin shëndetësor. Pas komenteve në media, se mjekëve nuk do t’u lejohet dypunësimi, Ministria ka sqaruar se nuk bëhet fjalë për dypunësimin në rastet e sektorëve privat dhe publik, por për rastet kur mjekët dhe infermierët ushtrojnë edhe profesione të tjera.
“Lidhur me lajmin e publikuar në media për ndalimin e dypunësimit të mjekëve, Ministria e Shëndetësisë dhe Mbrojtjes Sociale sqaron se, një nga nenet e propozuara në ligjin e ri të kujdesit shëndetësor, nuk ka të bëjë me ndalimin e dypunësimit të mjekëve, por me ndalimin e ushtrimit të dy profesioneve të ndryshme në të njëjtën kohë. Ndryshimi i propozuar lidhet me faktin se, kur një profesionist shëndetësor ka dy profesione, psh. stomatolog dhe farmacist, pra ka dy diploma, ai duhet të zgjedhë cilin profesion do të ushtrojë dhe ndërkohë duhet të pezullojë licencën tjetër”, njofton Ministria e Shëndetësisë.
Ky ndryshim i propozuar, thuhet nga ministria, ka ardhur pas shqetësimit të urdhrave profesionistë, pasi ushtrimi njëkohësisht i dy profesioneve shpesh herë rezultonte fiktiv./Opinion.al
