Pasi dha deklaratën e tij në Prokurori për protestën e 8 Janarit, në një prononcim për mediat, Sekretari i Përgjithshëm i PD, Gazment Bardhi u shpreh se asnjë person brenda selisë nuk ka sulmuar, por incidentet e ndodhura nga persona brenda selisë sipas tij kanë qenë akte vetëmbrojtjeje.
“Kam dhënë deklarime për çdo çështje që jam pyetur nga organi i Prokurorisë. Nuk ka pasur sulm nga asnjë person nga brenda selisë. Ka pasur akte vetëmbrojtje për të ndaluar protestuesit e dhunshëm që të futen në ambientet ku po zhvillohej mbledhje në katin e dytë. Për këtë episod kam dhënë shpjegimet e mia në prokurori”.
Bardhi ndër të tjera ka folur edhe për dyert e blinduara të selisë blu duke theksuar se u morën masa për të parandaluar gjakderdhjen e demokratëve.
“Ajo që kam thënë për dyert metalike, jo të blinduara, kam konfirmuar se asnjë zyre nuk i është ndryshuar për t’i bërë të blinduara. Ju keni parë se zyrat tona të punës nuk kanë patur derë metalike dhe as xhama blind. Kam pohuar që PD-ja mori masa për të shmangur konfliktin që po stiste Berisha dhe morëm masa për të frenuar atë që kishte përgatitur Berisha, gjakderdhjen e demokratëve.”-tha Bardhi./Opinion.al
