Në seancën e nesërme plenare mund të shkohet me dy drafte për ligjin e Vettingut.
Partia Demokratike ka dorëzuar zyrtarisht në komisionin e posaçëm amendamentet e plota të ligjit për Vettingun. PD ka dorëzuar 7 çështje që përkthehen në 28 amendamente.
Sipas Partisë Demokratike drafti i miratuar nga mazhoranca paraqet probleme të thella me Kushtetutën, ndërsa i hap rrugën kontrollit të qeverisë mbi organet e drejtësisë.
Disa nga argumentet e PD janë:
Një ditë para seancës së jashtëzakonshme plenare të 30 gushtit, të thirrur enkas për të miratuar p/ligjin e Vetingut, Partia Demokratike ka depozituar në Kryesinë e Kuvendit pjesën e dytë të amendamenteve të saj përsa i përket këtij drafti, i cili u miratua nga Komisioni i Reformës në Drejtësi vetëm me votat e mazhorancës.
Pavarësisht refuzimit të mazhorancës si dhe të ekspertëve ndërkombëtarë për të marrë në konsideratë amendamentet e PD-së për 25 nenet e para të p/ligjit, të dorëzuara në Kuvend më 22 Gusht, demokratët kanë paraqitur 28 të tjera përsa i përket neneve 26-67 të këtij drafti, të cilin vazhdojnë ta cilësojnë antikushtetues.
Janë 7 cështjet më shqetësuese të evidentuar nga demokratët.
1) E para ka të bëjë me rolin aktiv dhe përcaktues që kanë organet e kontrolluara apo nën varësinë e pushtetit ekzekutiv, si ILDKP dhe DSIK. “Në këtë mënyrë – gjykon Partia Demokratike – projektligji ka asgjësuar thelbin e Reformës Kushtetuese sepse kontrollin dhe vendimmarrjen e procesit të vettingut e ka zhvendosur nga organet e krijuara rishtas dhe të konceptuara si organe të pavarura, tek organet ekzistuese të pareformuara dhe të kontrolluara nga Qeveria.
2) Shqetësimi i dytë i PD-së ka të bëjë me mbikqyrjen dhe kontrollin e Qeverisë ndaj organeve të reja të Vetingut, pasi telekomunikimet dhe të ardhurat financiare të anëtarëve të tyre kontrollohen në mënyrë periodike nga agjenci nën varësi të Qeverisë. Në këtë mënyrë, Reforma rrezikon të dështojë dhe të humbasë besueshmërinë e publikut, paralajmërojnë demokratët.
3) PD e cilëson të qëllimshme mungesën e detajimit në tekst të procedurës së përzgjedhjes dhe emërimit të anëtarëve të organeve të Vetingut, si dhe procesin e vlerësimit të kandidaturave.
4) Shqetësimi i katërt ka të bëjë me procesin dhe standartet e kontrollit të figurës që sipas PD-së cënojnë të drejtat dhe liritë themelore të njeriut, sanksionuar në Kushtetutë dhe në Konventën Europiane për të Drejtat e Njeriut, si dhe në nenin DH të aneksit të Amendamenteve Kushtetuese. Kjo pasi projekligji, thekson opozita, kontrollin e bazon tek elementë që nuk përmbushin standartet e provës të marrë në formën e kërkuar nga ligji.
5) Drafti i miratuar në Komision nga mazhoranca cënon parimin e barazisë përpara ligjit, standardet e procesit të rregullt ligjor si dhe parimin e llogaridhënies së organeve kushtetuese, si element thelbësor i shtetit të së drejtës, gjykojnë demokratët.
6) Shqetësimi i gjashtë i PD-së është dhunimi i parimit të sigurisë juridike, pasi teksti është i paqartë, konfuz dhe në disa raste kontradiktor. Kjo rrezikon të krijojë në praktikë një ngërc institucional, zvarritje dhe konflikte kompetencash.
7) Së fundmi, p/ligji në formën e miratuar lë hapur mundësinë për rifutjen në sistem të individëve që kanë ushtruar detyrën e gjyqtarit dhe prokurorit përgjatë regjimit komunist.
Shkresa e dërguar nga sekretari i Përgjithshëm i PD-së, Arben Ristani, në adresë të kryeparlamentarit Meta dhe kreut të Komisionit të Reformës në Drejtësi, Fatmir Xhafaj, mbullet duke u rikujtuar marrësve procedurat parlamentare. P/ligji në fjalë është shqyrtuar dhe miratuar në parim nga Komisioni në një kohë kur nuk kishte ende bazë kushtetuese, pretendon Ristani, ndërsa shton se neni 83/3 i Kushtetutës ndalon shqyrtimin dhe miratimin me procedurë të përshpjetuar të një ligji që miratohet me shumicë të cilësuar.
