Terroristët shqiptarë në rradhët e ISIS Lavdërim Muhaxherri dhe Ridvan Haqifi dyshohet se urdhëruan akte terroriste në Shqipëri. Burimet e ABC News thonë se dy terroristët instruktuan fillimisht disa kosovarë. Më pas këta të fundit i përcollën porositë tek 4 të arrestuarit në Shqipëri, që u vunë në pranga 1 ditë para lumnimit të 38 martirëve të Kishës Katolike dhe 1 javë para ndeshjes Shqipëri-Izrael.
Lavdërim Muhaxheri dhe Ridvan Haqifi dyshohet se janë personat që kanë dhënë urdhëra për sulme terroriste në Shqipëri, Kosovë dhe Maqedoni. ABC Neës ka mësuar se këta dy të dyshuarit, të cilët janë shumë aktivë si pjesë e celulave terroriste ISIS gjatë luftimeve në Siri dhe Irak, kanë komunikim të vazhdueshëm me shtetasit shqiptarë nga Kosova, disa prej tyre tashmë të arrestuar ditët të fundit.
Burimet thonë se gjatë këtyre komunikimeve, është arritur të transkiptohen disa biseda, ku kërkohet që të organizohet një sulm me eksploziv dhe më pas me armë në stadiumin “Loro Borçi” të Shkodrës, gjatë ndeshjes Shqipëri-Izrael. Veç këtyre urdhërave, mësohet se mes tyre është biseduar edhe për sulm me armë ose eksploziv ndaj institucioneve të vuajtjes së dënimit, ku ndodhen të izoluar 9 të dënuarit e parë shqiptar, që dërgonin besimtar musliman në Siri. Këto biseda dhe urdhëra, thonë burimet e ABC News, transmetoheshin më pas gjatë takimeve fizike me shtetasit e ndryshëm në Kosovë, Shqipëri dhe Maqedoni. Në mesin e këtyre takimeve dhe bisedave, prokuroria dyshon se ka qenë edhe imami i vetshpallur i xhamisë së fshatit Kastriotit të Dibrës, tashmë i arrestuar Xhezair Fishti.
Ky i fundit, thonë burimet rezulton se është edhe personi me më shumë hyrje-dalje në Kosovë kohët e fundit, çka ka lindur dyshime se është pjesë e celulës terroriste të ngritur në Kosovë me urdhër të Lavdërim Muhaxherit dhe Ridvan Haqifit. Burimet thonë se vetë 4 të arresturit në Shqipëri, doktori Bekim Protopapa, berberi Ergys Faslija, rrobaqepësi Medat Hasani dhe imami i vetshpallur Xhezair Fishti nuk kanë komunikime direkte me urdhërdhënësit nga Siria. Por në ngarkim të tyre janë fiskusuar disa komunikime dhe takime me shtetas të tjerë, ku diskutohet për hakmarrje ndaj të pafeve, si për dënimin e 9 të pandehurve ashtu edhe për shtetas të huaj që vijnë në Shqipëri.
I gjithë materiali referues i nisjes së hetimeve dhe arrestimi në Shqipëri i 4 personave dhe Kosovë të 9 të tjerëve e 3 personave në Maqedoni, ka ardhur nga shërbimet intelegjente partnere, të cilat kanë fiksuar biseda për kryerje të akteve terroriste. Për këto dyshime, është bërë edhe ndërhyrja për arrestimin e tyre për të evituar çdo incident të mundshëm si për lumturimin e 38 martirëve katolikë në meshën e Shkodrës ashtu edhe para dhe gjatë ndeshjes Shqipëri-Izrael, që tashmë do të zhvillohet në Elbasan. /ABC News/
