Dy pacientë me koronavirus do të dalin nga spitali infektiv pasi kanë rezultuar negativë në 2 teste për koronavirusin.
Lajmin e dha prof. Najada Çomo, shefe e shërbimit infektiv në QSUT në një lidhje të drejtëpërdrejtë me ministren e Shëndetësisë Manastirliu.
“Sot jemi shumë të gëzuar sepse kemi dy qytetarët që i kemi gati për t’i nxjerrë nga spitali. Gëzimi është dypalësh, edhe për ata vetë që u shëruan, dhe e dyta edhe për ne që na gëzon që puna e kryer deri tani na dha dy rastet e suksesshme. Sigurisht që kemi pritje edhe për punë më të mira, por të gjithë do të bëjmë maksimumin e mundshëm për t’u shërbyer deri në fund”, u shpreh prof. Najada Çomo, shefe e shërbimit infektiv në QSUT.
Dy pacientët janë kontakte të pacientit të parë të identifikuar në Shqipëri, djalit 26-vjeçar që erdhi nga Firence. Pas daljes nga spitali, ata do të vazhdojnë të qëndrojnë të izoluar për 14 ditë në shtëpitë e tyre.
Mjekja njoftoi gjithashtu se dy prej katër pacientëve në terapi intensive janë në gjendje më të mirë shëndetësore./Opinion.al
