Një përplasje mes dy bashkëfshatarëve ka ndodhur mbrëmjen e djeshme në Borsh të Himarës. Familjet janë të dyja me origjinë nga Mirdita, por që janë shpërngulur vitet e fundit në zonën bregdetare. Paradoksi qendron në faktin se banorët e rinj të Borshit zihen e rrihen për pronësinë e tokës.
Policia tha se është arrestuar shtetasi Gjon Marku pasi në vendin e quajtur “Kubovë-Shkallë” u ka dalë përpara fqinjëve të tij dhe pasi është konfliktuar më ta për motive pronësie i ka goditur me pjesën e pasme të sëpatës duke i lënë të dëmtuar.
I plagosur në gjendje të rëndë ndodhet shtetasi Mark Gjini, i cili nga shtrati i spitalit rrëfeu ngjarjen dhe historinë e konfliktit me fqinjin.
“Papritmas na doli dhe me sëpatë në dorë dhe me hunj dy metra na kanë qëlluar, njoftuam policinë, dhe nuk erdhi se i ka paguar ky zotëria edhe policët. Ai i ka blerë me lekë policinë dhe bashkinë e Himarës derisa policia nuk vjen në vendngjarje. Nuk erdhi as ambulanca, morëm taksi me ardhë në spital. Më ka vrarë në kokë, dorë e këmbë. Mirë që erdhi një komshi i joni që na shpëtoi. E kam rregulluar shtëpinë me gjak e shpirt deri sa e kam futur në legalizim, në 2005 kam paguar çdo lloj detyrimi për atë shtëpi, taksë vendore, drita e ujë. Ai gëzon shtëpinë time, unë rri në kasolle. Kam 4 vite nëpër procese gjyqësore, dhe të drejtën e merr ai e jo unë. O do të më shuajë ai mua, o unë atë se drejtësi s’po gjej kurrkund,” tha Mark Gjini.
