Policia e Elbasanit ka reaguar pas denoncimit të kreut të PD-së, Lulzim Basha, në lidhje me arrestimin e një biznesmeni, i cili u kap me 800 mijë euro dhe me dy leje drejtimi në emër të Saimir Tahirit.
Policia ka konfirmuar se Orest Sotës iu sekuestrua një shumë e madhe eurosh, por nuk dha asnjë informacion nëse personit në fjalë i janë gjetur dy leje drejtimi automjetesh në emrin e Saimir Tahirit.
Zyrtarisht, Policia njofton se: Me datë 02. 11. 2017, u bë arrestimi në flagrancë i shtetasit O.S vjeç 25, banues në Tiranë, administrator i një subjekti privat sh.p.k pasi më datë 01.11.2017, në rrugën nacionale, në fshatin Balldren, u kap duke drejtuar pa leje drejtimi mjetin “Land Rover” dhe nga kontrolli në mjet ju gjetën e bllokuan një sasi e madhe eurosh, i cili pretendonte se do t’i përdorte për likujdimin e faturave, por të pa shoqëruara me dokumentin e origjinës.
Materialet në ngarkim të këtij shtetasi u referuan në Prokurorinë e Rrethit Gjyqësor Elbasan, për Veprat Penale parashikuar nga nenet 291, 242 e 180 të Kodit Penal.
Kreu i PD-së Lulzim Basha ka denoncuar sot se Orest Sotës i janë gjetur në makinë 800 mijë euro dhe dy patenta për drejtim makine, në emër të Saimir Tahirit.
