Megjithëse policia shqiptare mohoi që skafet me drogë, të cilët u kapën nga policia greke ishin nisur nga bregdeti shqiptar, të tjera detaje kanë dalë në dritë nga mediat helene.
Sipas tyre, referuar burimeve të hetimit, dy skafet transportonin 2.5 tonë marijuanë nga Vlora për në Turqi, ku më pas do të shkëmbehej me 150 kilogramë heroinë.
Skafistët, të cilët ishin të mirë përgatitur, çanin detin vetëm nëse moti ishte me rrufe apo me erëra të forta. Trafikantët madje ndiqnin lajmet për të ndryshuar itinerarin e tyre nëse do të ishte e nevojshme.
“Arsyeja e këtij shkëmbimi është rritja e kërkesës për marijuanë në Turqi, ku një kilogram kushton deri në 4 mijë euro, ndërsa në Greqi kushton një mijë euro. Ndërsa heroina do të shitej në Greqi dhe në Europë ku dhe është më e shtrenjtë”, shkruajnë mediat greke.
Në 25 Shtator të këtij viti, skafi i parë u identifikua dhe policia vuri në pranga tre shtetas shqiptarë. Skafi e kishte lënë marijuanën në brigjet turke dhe po kthehej me heroinën, e cila ishte hedhur në det gjatë ndjekjes nga policia.
Operacioni i policisë, dhe pse duhej të mbahej sekret, u dëshmua dhe me një video, duke vështirësuar lokalizimin e skafit të dytë, që ndodhi aksidentalisht. Në 29 Shtator pra katër ditë më vonë, skafi u gjet i ndaluar në breg.
35-vjeçari shqiptar u tha agjentëve të policisë se ishte emigrant i paligjshëm, por ata nuk e besuan. Nga hetimet rezultoi se ai ishte pikërisht skafi i dytë, dhe të nesërmen në një shpellë aty pranë u gjetën 1 ton dhe 127 kilogramë marijuanë e paketuar. Skafet ishin të pajisura me sisteme të tilla për të mos u gjurmuar dhe kishin një furnizimi që i lejonte të udhëtonin deri në 6 ditë në det./ Opinion.al
