“Dy mjaftojnë!” Është ky slogani i fushatës së parë të planifikimit familjar të hartuar nga qeveria e Egjipit. Bëhet fjalë për një strategji që i ngjason asaj të fëmijës së vetëm në Kinën e Deng Xiapoing që shërbeu për të bllokuar rritjen demografike, por në këtë rast nuk do të jetë e detyrueshme.
Kairo synon mbi të gjitha që të ndryshojë mentalitetin, të informojë gratë e pashkolluara dhe të vërë në dispozicion të të gjithëve metodat kontraceptive. Janë traditat ato që shtyjnë familjet e varfra të kenë shumë fëmijë, pasi kultura islamike nuk e pengon planifikimin familjar.
Në Egjipt numri mesatar i fëmijëve për një grua është zvogëluar nga 5,6 në vitin 1976 në 2,9 në vitin 2018. Por gjithsesi, kjo mbetet një shifër e lartë pasi çdo vit shtohen rreth 2 milionë fëmijë. Në fund të vitit 2019 Egjipti pritet të arrijë shifrën e 100 milionë banorëve.
Duhet marrë në konsideratë fakti se vetëm një rrip i ngushtë toke pëgjatë lumit Nil mund të prodhojë ushqime bujqësore, ndërsa e gjithë pjesa tjetër është e shkretë. Kjo bën që qeveritë egjiptiane të kenë vazhdimisht probleme me sigurimin e ushqimit për banorët dhe uljen e varfërisë./Opinion.al
