Dy fëmijë janë gjetur mes trupave 18 trupave të djegur që u zbuluan nga zjarrfikësit grekë në pyllin e Dadias. Trupat që mendohet t’iu përkasin emigrantëve të paligjshëm janë karbonizuar si pasojë e zjarrit të madh që ka përfshirë Aleksandropolin.
Mjeku ligjor i Aleksandoupolit Pavlos Pavlidis ekzaminoi në mënyrë makroskopike trupat e djegur të njerëzve në vendin ku u gjetën, pranë fshatit Avantas, dhe konfirmoi se dy prej viktimave janë të mitur.
“Ishin gjithsej tetëmbëdhjetë trupa të djegur, të gjithë burra, dhe dy prej tyre ishin fëmijë. Ata u gjetën të gjithë në grupe nga dy ose tre persona, në një distancë prej 500 metrash, me sa duket pasi kanë vrapuar në përpjekje për të shpëtuar. Siç më shpjeguan policët që më shoqëronin, zona është një vendkalim për emigrantët e parregullt, në rrugën përmes vargmalit të Rodopit”.
Mjeku ligjor sqaroi po ashtu e trupat do të dërgohen nesër në spital për autopsi.
Thashethemet për zbulimin e tetë trupave të tjerë në një vend tjetër të prekur nga zjarret nuk u konfirmuan nga mjekësia ligjore.
Sakaq, ministri i Emigracionit, Dimitris Kairides, përmes një deklarate është shprehur i pikëlluar për humbjen e 18 jetëve.
“Me pikëllim të madh mësuam vdekjen e të paktën 18 emigrantëve nga zjarri në pyllin e Dadias. Me gjithë përpjekjet e vazhdueshme dhe këmbëngulëse të autoriteteve greke për të mbrojtur kufijtë dhe jetën njerëzore, kjo tragjedi konfirmon edhe një herë rreziqet e emigracionit të parregullt. Në këtë kuadër nënvizojmë dhe denoncojmë edhe një herë veprimtarinë vrastare të trafikantëve kriminalë, që rrezikon çdo ditë jetën e shumë emigrantëve si në tokë ashtu edhe në det”, tha ai.
