Mes pistave që policia dhe prokuroria po heton për vrasjen e Artan Cukut, është edhe një dosje që ish-drejtori i Vlorës ka rihapur me iniciativën e tij.
Bëhet fjalë për përplasje me armë që ka ndodhur në Vlorë në vendin e quajtur “Pusi i Mëzezit”. Grupe kriminale që merreshin me trafikun e drogës ishin përplasur fillimisht në Spanjë dhe më pas në Vlorë.
Dosja ishte e mbyllur por ka qenë Artan Cuku ai që rihapi hetimet, çka solli më pas edhe arrestimin e një personi.
Pak ditë pas kësaj ngjarje, ish-drejtori i Policisë së Vlorës është kërcënuar me jetë.
Ndërkohë kur ka qenë në strukturat e Fierit Artan Cuku ka rihapur një tjetër dosje të mbyllur. Në atë kohë filluan hetimet për një grup kriminal që vepronte jashtë shtetit, por që pastronte paratë në Fier.
Edhe në këtë rast Policia dyshon se mund të ketë persona që janë hakmarrë ndaj Artan Cukut.
Për të dyja këto raste janë duke riparë dosjet dhe pritet që të merren në pyetje disa persona.
Artan Cuku u vra mbrëmjen e së shtunës në “Rrugën e Kosovarëve” në Tiranë.
