Dy ditë më parë ish-deputeti i Partisë Demokratike, Bardh Spahia u la i lirë nga Gjykata e Apelit Shkodër. Ai akuzohej për përplasjet mes mbështetësve të opozitës dhe policisë në shkollën “Shejnaze Juka” në Shkodër. Për këtë gjykata vendosi si fillim për të masën “arrest shtëpie”.
Në një intervistë televizive, Spahia ka rrëfyer ditën e sotme momentet e arrestimit duke deklaruar se kjo gjë ishte vendosur nga kryeministri Rama. Madje sipas tij njësi operacionale që kreu ndalimin e tij nuk e dinte se përse po e bënte këtë gjë.
“Ajo pjesë e ndalimit ishte publike, absurde, që në momentin kur u tha në lidhje Live, isha i vetëdijshëm që e ka vendos kryeministri, por fakt është që psikologjikisht e prisja, por e ndjeja veten qytetar të lirë. Mu duk sikur policët që morën pjesë në ndalim nuk e dinin arsyen pse po më ndalonin, merrnin urdhra me telefon nga shefi i tyre dhe nga njësia operacionale që unë i pash, ishin me maska ishin pas makinës së policisë, në një makinë civile, sikur po ndalonin një të shumëkërkuar. Për mua ishte një situatë absurde, një izolim i padrejtë e krejtësisht politik. Me ato policë që kisha komunikim u munduan të më tregojnë vlerësimin dhe respektin, keqardhjen e tyre për situata të tilla. Kisha një izolim të plotë, një prej gjërave që të bënte përshtypje ishte izolimi i plotë nga jashtë. Nuk kisha asnjë lloj informacioni, s’kisha asnjë mjet komunikimi, izolimi ishte i plotë” tha Spahia.
Ai shtoi se nuk do ta lë me kaq këtë çështje por se do ngrejë padi për të gjetur përgjegjësit për arrestimin e tij. Këtë gjë ai tha se e bën për të gjithë ata qytetarë të cilët janë ndaluar në mënyrë të padrejtë dhe pa arsye.
“Do t’i shkoj kësaj çështje deri në fund, pastaj do të jenë organet kompetente që do të nxjerrin përgjegjësit të kujt kanë qenë. Këtë nuk e bëj për vete, e bëj më shumë edhe për ato qindra aktivistë të PD, mbështetës, protestues që janë ndaluar e mbajtur në mënyrë të padrejtë nga strukturat e rendit të influencuara e të drejtuara politikisht apo të përdorura politikisht nga kundërshtarët tanë. Është e tmerrshme të shikosh se si qytetarë të thjeshtë, qytetarë të ndershëm të këtij vendi, janë ndaluar pa asnjë argument, janë burgosur në mënyrën më të shëmtuar të mundshme sikur ne të ishim pjesë e një vendi diktatorial” u shpreh ndër të tjera Bardh Spahia. /Opinion.al
