Dy deputetë të PS në komisionin e Sigurisë, Xhemal Qefalia dhe Arben Çuko kanë kërkuar raportim në komision për kërcënimin e Kryeprokurorit Adriatik Llalla. Në kërkesën e depozituar prej tyre thuhet se kreu i policisë së Shtetit Haki Çako dhe kreu i SHISH Visho Ajazi duhet të informojnë lidhur me këtë ngjarje.
Kërcënimi ndaj Llallës dyshohet se ka ndodhur në qershor, por u bë publik vetëm pak ditë më parë. Kërcënuesi i ka përmendur Kryeprokurorit familjen dhe fëmijët. Për këtë arsye, ai ka njoftuar Presidentin, kreun e SHISH-it, komandantin e Gardës dhe drejtorin e Përgjithshëm të Policisë së shtetit.
Në vijim të masave për të evituar çdo rrezik, familja e kreut të organit të akuzës, është vendosur në Gjermani. Ngjarja po hetohet nga Prokuroria e Krimeve të Rënda.
