Aktualitet

Dvorani: Në Shtator nis Gjykata Kushtetuese, nuk na bllokon askush


               Publikuar në : 16:00 - 22/07/19 |
geliano fataj

Në fillim të shtatorit pritet që Gjykata Kushtetuese të behet funksionale. Kreu i Këshillit te Emërimeve në Drejtësi thotë se të mërkurën do të nisë shqyrtimi i 14 kandidatëve të propozuar për të plotësuar vakancat në Kushtetuese dhe brenda muajit Gusht sipas tij lista do t’i çohet Kuvendit dhe Presidentit.

“Pasnesër Këshilli do të marrë në shqyrtim 14 nga kandidatët, për të lejuar apo ndaluar kandidimin e tyre dhe në ditët në vijim, që sigurisht do të jenë shumë shpejt, ndoshta brenda javës apo në fillim të javës tjetër, edhe pjesën tjetër të kandidatëve. Mbas këtyre vendimeve Këshilli do të kalojë në fazën e vlerësimit, pikëzimit dhe renditjes së kandidatëve, e cila edhe sipas ligjit është e detyrueshme të përfundojë në një afat maksimal 10-ditor. Kushtetuta dhe ligji parashikojnë që Këshilli i Emërimeve në Drejtësi duhet të kryejë procesin e verifikimit dhe vlerësimit dhe organet e emërtesës që në këtë rast do të jenë Presidenti i Republikës dhe Kuvendi kanë një afat maksimal 30 ditor, nga dita që dokumentacioni përkatës mbërrin nga KED. Pra mund të prezumohet që nëse ne në fillim të gushtit përcjellim renditjet përkatëse te Presidenti i Republikës dhe Kuvendi, ata duhet që brenda një muaji të përfundojnë procedurën e tyre”.

Dvorani sqaron se Kushtetuta e ka parashikuar qartë dhe nuk ka hapësira për bllokim të këtij procesi.

Presidenti dhe Kuvendi kanë të drejtë të zgjedhin secili nga 3 anëtarë të gjykatës kushtetuese nga 9 që ka në përbërjen e saj kjo gjykatë. 3 anëtaret e tjerë zgjidhen nga Gjykata e Lartë, e cila po ashtu është jofunksionale për shkak të vakancave të krijuara nga procesi i vettingut apo përfundimi i mandateve.

Anëtarët e Gjykatës së Lartë zgjidhen nga KLGj, i cili ka lajmëruar se ky proces përzgjedhës do të nisë në Shtator./ Opinion.al

Pas