Kreu i Këshillit të Emërimeve në Drejtësi, Ardian Dvorani, do të thirret si dëshmitar para Komisionit Hetimor që është ngritur për hetimin e Presidentit Meta.
Komisioni i Posaçëm që po heton ligjshmërinë e veprimeve të Presidentit në kuadër të ushtrimit të kompetencave të tij lidhur me zhvillimin e zgjedhjeve për organet e qeverisjes vendore ka miratuar sot disa shtesa në objektin e hetimit.
Me propozim të deputetëve të mazhorancës, janë bërë pjesë e këtij komisioni veprimet e Presidentit në funksion të emërimit të anëtarëve të Gjykatës Kushtetuese.
Në planin e hetimit të miratuar anëtarët e komisionit kanë vendosur që të thirret për të dëshmuar kreu i KED, Ardian Dvorani.
Deputetët e opozitës u shprehën kundër vendimit për shtesën e objektit të hetimit ndaj Presidentit. Deputeti Alban Zeneli e quajti këtë një lojë politike mes shumicës dhe Presidentit.
Kujtojmë se Presidenti Meta ka ngritur një padi penale ndaj Dovarnit pasi e akuzon se ka shkelur Kushtetutën me dërgimin e të dyja listave për plotësimin e njëkohshëm të anëtarëve të Gjykatës Kushtetuese. /Opinion.al
