Sezoni i ri turistik në Durrës premton më shumë risi për pushuesit vendas dhe të huaj.
Përveç bukurive natyrore, pasurisë arkeologjike, ky sezon do të sjellë edhe mundësinë për turizëm aventuror.
Guidat në natyrë, shtigjet turistike dhe ekoparku, i cili përfshin murin më të lartë në Ballkan për ngjitje argëtuese, janë disa nga atraksionet që ofron qyteti bregdetar.
Floreta Kërtusha, Drejtoria e Turizmit, Bashkia Durrës:Një produkt i ri turistik ose që ne po synojmë të promovojmë së fundmi është edhe itinerari ecje-ngjitje, apo promovimi i shtigjeve natyrore sepse ka shumë interes sa i përket turizmit të aventurës. Vitin e kaluar kemi një atraksion të ri nëse mund ta quajmë kështu që është muri alpin që gjendet tek ekoparku, i cili është ndër muret më të larta për ngjitje në Ballkan.
Durrësi nuk është më i destinuar vetëm për turistë nga rajoni dhe Europa, por edhe për ata nga Amerika e largët.
Floreta Kërtusha: Nuk kemi turistë vetëm nga Europa, Gjermania, Franca, Italia apo vendet nordike, por shënohet një rritje në numrin e hyrjeve nga shtete të tjera në botë si SHBA, Kanadaja, Argjentina, India, Japonia.
Shtimi i numrit të turistëve ka shtyrë markat e njohura në nivel global të investojnë në industrinë e turizmit, duke u bashkuar me investitorët vendas.
Floreta Kërtusha: Duke pasur dhe gjithë këto marka ndërkombëtare që ofrojnë një infrastrukturë akoma dhe më cilësore për turistë që ne i quajmë elitarë kjo e shton kapacitetin akomodues në qytetin tonë për ata lloj turistësh që mund të gjejnë ato shërbime turistike më cilësore për të cilën ata janë të interesuar. Më së miri i plotësojmë të gjitha kapacitetet akomoduese dhe mbajmë fluksin më të madh të turistëve për të 365 ditët e vitit dhe jo vetëm për sezonin turistik veror.
Durrësi ka në total 168 hotele, me 4859 dhoma dhe 11,528 shtretër, dhe ka edhe të tjera godina që janë në fazën e investimit./ Klan News
