Një 25-vjeçar është arrestuar nga Policia e Durrësit pasi ka thyer karantinën dhe masën e sigurisë të arrestit në shtëpi.
Sipas informacioneve, i riu është liruar nga burgu i Rrogozhinës në kuadër të masave anti-covid duke u lejuar të vazhdonte vetkarantinimin gjatë arrestit në shtëpi.
Në momentin që policia ka konstatuar se 25-vjeçari ka thyer masat, ai u është kundërpërgjigjur me dhunë.
Tashmë të riut përveç akuzës së tentativës për vrasje, i shtohen edhe akuzat e largimit të të burgosurit nga vendi i qëndrimit, dhe kundërshtim i punonjësit të policisë.
Njoftimi i Policisë së Durrësit:
“Gjithashtu u arrestua në flagrancë shtetasi M. B., 26 vjeç, banues në Durrës.
Për këtë shtetas, në kuadër të masave të mara për parandalimin e përhapjes së COVID-19, nga IEVP Rrogozhinë është vendosur që dënimin e mbetur ta kryente në shtëpi, duke u vetëkarantinuar.
Pas konstatimit se ky shtetas ndodhej jashtë ambienteve të banesës së tij, duke thyer masën e sigurisë “Arrest në shtëpi” dhe vetëkarantinimin, është shoqëruar në ambientet e Policisë nga shërbimet e Policisë, të cilët i ka kundërshtuar me dhunë.
Materialet i kaluan Prokurorisë së Rrethit Gjyqësor Durrës, për veprat penale “Tentativë për vrasje”, ” Largimi i të burgosurit nga vendi i qëndrimit” dhe “Kundërshtim i punonjësit të policisë”./ Opinion.al
