Një 29-vjeçar është arrestuar nga policia e Durrësit për armëmbajtje pa leje dhe shpërndarje të lëndëve narkotike. Arrestimi i të riut me inicialet Sh. H. dhe banim në Maminas është kryer në kuadër të operacionit të koduar “Nënkalimi”, ndërsa është sekuestruar një armë zjarri tip pistoletë dhe një sasi kokaine. Policia bën me dije se 29-vjeçari ka qenë i dënuar më parë në Gjermani, për trafikim të lëndëve narkotike.
“Në vendin e quajtur “Ura e Dajlanit”, shërbimet e Policisë kanë ndaluar mjetin tip “Volkswagen” me drejtues shtetasin Sh. H. Gjatë kontrollit të automjetit me të cilin qarkullonte ky shtetas, Policia gjeti një armë zjarri, 1 krehër me 6 fishekë, lëndë narkotike të dyshuar kokainë dhe tre aparate celular, të cilat u sekuestruan në cilësinë e provës materiale së bashku me automjetin tip Volkswagen”, bën me dije policia. I riu do të gjykohet për veprat penale “Armëmbajtja pa leje” dhe “Prodhimi dhe shitja e narkotikëve”./Opinion.al
