Kreu i Prokurorisë së Posaçme kundër Korrupsionit dhe Krimit të Organizuar, Altin Dumani ka deklaruar se numri i procedimeve penale dhe numri i personave të marrë nën hetim nga institucioni që ai drejton është rritur. Këto të dhëna Dumani i raportoi mëngjesin e kësaj të enjteje përpara Këshillit të Lartë të Prokurorisë.
Mësohet se seanca e sotme në KLP kishte për objekt veprimtarinë e strukturës përgjatë vitit 2022.
Mes të tjerash, Dumani shtoi se është rritur gama e databazave të institucioneve ku struktura e posaçme ka akses direkt dhe se është rritur numri i hetimeve për “pastrimin e parave.”
“SPAK ka demonstruar se rastet për pastrim parash janë në rritje. Në 2022, 12 çështje të reja, çështje me burim kallëzimi nga juridiksione të huaja. SPAK i ka kushtuar vëmendje të veçantë veprave penale në trafik narkotikësh apo terrorizmit. Janë rritur me 30% çështjet lidhur me korrupsionin. Po ashtu prokurorët u janë nënshtruar disa trajnimeve të rëndësishme”, u shpreh ai.
