Tre deputetë, njëherësh kryetarë të partive të vogla në parlament, Vangjel Dule (PBDNJ), Dashamir Shehi (LZHK) dhe Nard Ndoka (PDK) janë bashkuar me themeluesit e Libra-s, Ben Blushi dhe Mimoza Hafizi. Nuk bëhet fjalë ende për një koalicion parazgjedhor, por për një kauzë politike: Ndryshimet në kodin zgjedhor.
Janë pikërisht këto ndryshime që do të sjellin më shumë siguri për ruajtjen e votës së partive të vogla. Lajmin e ka bërë të ditur Ben Blushi i cili poston foton në facebook dhe shkruan: “Sot me Mozën, Dash Shehin, Vangjel Dulen, Agron Dukën dhe Nard Ndokën për zgjedhjet. Jemi në një mendje për numërim elektronik të votave, për votimin e emigrantëve, për kufizimin e financimeve të partive dhe për dekriminalizim të listave për deputetë!”.
Ata i bëjnë thirrje deputetëve të tjerë, veçanërisht anëtarëve të Komisionit të Reformës Zgjedhore, të marrin seriozisht kërkesat e tyre.
Në deklaratën e përbashkët të partive të vogla thuhet se “ne do ta vazhdojmë betejën tonë politike në parlament, lidhur me çështjet emergjente të reformës zgjedhore. Zgjedhjet e lira e të ndershme janë kryefjala e aktivitetit politik në muajt që kanë mbetur. Zgjedhjet e lira e të ndershme janë kushti i integrimit të vendit tonë në BE”
/Opinion.al
