FSHF ka zhvilluar ditën e sotme Asamblenë e përgjithshme të jashtëzakonshme, mbledhja më e rëndësishme e vitit, ku u miratuan disa ndryshime.
Ndër ndryshimet e miratuara është edhe shkrirja e Komisionit të Etikës e cila do të bëhet një me Disiplinën, praktikisht siç funksionon në UEFA. Në këtë asamble u miratuan gjithashtu edhe disa ndryshime në statut.
Kjo mbjedhje është zhvilluar në kushte të pazakonta, detyruar nga protokolli shtetëror për parandalimin e përhapjes së COVID-19.
Ndërkaq, ndër të tjera me mbylljen e vitit 2020, përfundon edhe afati i premtuar nga qeveria shqiptare për të miratuar një ligj të përshtatshëm të sporteve. Fokusi kryesor do të ishte te pjesa e sponsorizimeve, që shihet si mënyra e vetme për të formalizuar sportin dhe për ta ndihmuar të zhvillohet.
Ndërsa nuk ka asnjë sinjal , edhe pas mbylljes së bojkotit, Presidenti i Federatës sulmoi Ministrinë e Sportit.
“Vazhdoj të besoj përsëri te premtimi i kryeministrit Edi Rama për ndryshim ligjor brenda vitit. Nëse nuk realizohet, ne nuk do të bojkotojmë, por do të bëjmë zgjidhjet e zgjedhjet tona. Mënyra shtetërore e drejtimit të sportit është e turpshme dhe më e turpshmja e 30 viteve të fundit. MAS i qeverisë Rama e theu rekordin e MTKRS-së të qeverisë paraardhëse. Me dy gërma më pak e kilometra indiferentizmi sportiv më shumë”.– tha ndër të tjera Duka
Fjala e plotë e Armand Dukës:
Kjo situatë na ka bërë që të mblidhemi për herë të dytë në këtë mënyrë. Jemi ndër të vetmet Federata që nuk kemi anuluar asnjë garë. Dua t’i falenderoj të gjithë për respektimin e protokollit dhe mbylljen e sezonit, gjë që u reflektua në Europë me kalimin e tureve nga skuadrat shqiptare në Europë, si Tirana, Laçi, Teuta.
FSHF ka bërë detyrën ndaj familjes së futbollit sa i takon bojkotit. Kemi marrë një premtim pozitiv nga Qeveria. E deklaroj publikisht se miratimi i Ligjit të Sponsorizimeve sipas propozimit tonë do bëjë të funksionojë sportin dhe do hapë faqe të re për këtë. Në pak vjet sporti do kthehet në ekonomi të fortë që gjeneron të ardhura dhe jo në një lypsar të rëndomtë që shtrin dorën për të mbijetuar.
Nuk kërkojmë lëmoshë por atë që na takon, ne dhe gjithë fëmijëve në Shqipëri. Futbolli kontribuon me rreth 45 milion euro në ekonomi. Të dhënat tona janë një pjesë e realitetit, ku nuk përfshihen mijëra të rinj që janë përfshirë në eventet tona.
Po punojmë për implementimin e projektit për 100 fushat. Jemi të vetëdijshëm se duhet shumë inpenjim. Qeveria nuk ka dënjuar as ta lexojë projektin tonë, por Ministria jonë e famshme e Arsimit është nxituar të na kthejë përgjigje negative. Ne do vazhdojmë projektin dhe meqë qeveria nuk përgjigjet ne do e mbështesim me 50 përqind. Çdo klub, individ që do të bëjë një fushë të re standarte do mbështete me kujdes. Mënyra shtetërore e drejtimit të sportit është e turpshme dhe më e turpshmja e 30 viteve të fundit. MAS i Qeverisë Rama e theu rekordin e MTKRS të asaj paraardhëse, me dy gërma më pak e shumë kilometra diferentizëm më shumë”, u shpreh Duka ndër të tjera./Opinion.al
