Ndërsa Shqipëria mundej 3-1 në miqësore nga Ukraina, presidenti i FSHF-së, Armand Duka, ka gjetur kohën për të marrë pjesë në emisionin “Calcio Totale”, për të folur rreth Peskarës dhe Ledian Memushajt. Mesfushori do të kthehet sot te klubi Italian për t’u përgatitur për ndeshjen play-off për ngjitjen në Serinë A, veprim për të cilin Duka ka pranuar se ka pasur mosmarrëveshje me trajnerin Xhani De Biazi.
“Nuk ishte e lehtë të bindja De Biazin. Në fund triumfuan raportet e mira mes meje dhe drejtuesve të klubit të Peskarës. Ka një vlerësim të ndërsjellë”, ishin fjalët e Dukës, i cili la të kuptohet se vendimi në fjalë ishte marrë vetëm falë insistimit të tij, raporton panoramasport.
Lidhjet e Dukës me drejtuesit e Peskarës janë të tilla, aq sa kreu i FSHF-së po mendon seriozisht të shkojë të shohë ndeshjen e nesërme. “Tani Peskara duhet të bëjë vetëm një gjë, të fitojë! E meriton. Ajo është skuadra që luan futbollin më të mirë. Mendoj se do të vi edhe unë në ndeshje. Pastaj do të marr me vete Ledianin, thelbësor edhe për kombëtaren tonë”, tha ai. Megjithatë mbetet për t’u parë nëse De Biazi e mendon në të njëjtën mënyrë për mesfushorin i cili mungoi për pjesën më të madhe të përgatitjeve për shkak të institimit të kreut të FSHF-së.
