Në një intervistë të gjatë në emisionin Opinion, presidenti i Federatës së Futbollit Armand Duka shpreh besimin para Blendi Fevziut se përfaqësuesja e futbollit ka mundësitë e saj në Europianin e Gjermanisë
“Nuk e kam parë si grup ferri, grup simpatik të luash kundër ekipeve më të mira në botë. Është bukur të sfidosh ekipe të tilla. Ndeshjet janë të gjitha të forta. S’ka diferenca të mëdha në futboll dhe mund t’ia arrijmë. Ne nuk do të jemi nën presion sepse nuk kemi gjë për të humbur në Europian”.
Jo vetëm kaq, Duka tregon përse duhet besuar se kombëtarja mund të kualifikohet edhe në Botërorin e ardhshëm.
“Kemi shanse reale. Nëse këto kualifikuese ku shkuam në Europian do të ishin për Botëror ne do ishim në botëror. Të shohim shortin se nuk do jetë e lehtë për Shqipërinë. Ne duhet të luftojmë dyfishin”.
Pavarësisht rezultateve në Europianin e Gjermanisë apo Ligën e Kombeve, Duka zbuloi se kombëtarja e futbollit do të vijojë të drejtohet nga Sylvinho dhe stafi i tij.
“Jemi të kënaqur me Sylvinho. I kemi ofruar rinovimin për një 2-vjeçar tjetër dhe do vazhdojmë bashkëpunimin me synimin për të shkuar në Botëror”.
Në emisionin kushtuar Federatës Shqiptare të Futbollit, Blendi Fevziu tregoi nga afër ndryshimet që ka pësuar ky organizëm dhe modernizimin njësoj si federatat e tjera europiane. Në atë që quhet ‘Shtëpia e Futbollit’ ka gjithçka i nevojitet jo vetëm kombëtares A, por të gjitha përfaqësueseve të futbollit të Shqipërisë. Presidenti Duka premtoi se nuk do të jetë e largët koha e ndërtimit të hotelit të përfaqësueses brenda kompleksit të Federatës.
