Kreu i Partisë Agrare Ambientaliste, Agron Duka i është bashkuar vendimit të Partisë Demokratike për të mos hyrë në zgjedhje pa një qeveri teknike.
Duka ka thënë për News24 se kishte firmosur shkresë për ç’rregjistrimin nga Komisioni Qëndror i Zgjedhjeve për të mos marrë pjesë në zgjedhjet e 18 qershorit. Po ashtu kreu i PAA i bën ftesë kreut të LSI, Ilir Meta të marrë një vendim.
“Takimi i koalicionit u bë për rrugën që kemi nisur dhe që duam ta çojmë deri në fund. Nuk do të hyjmë në zgjedhje pa qeveri teknike. Meta është i pavendosur në vijimin e aleancës, duhet të marrë vendim dhe të përgjigjet me veprime. Sapo firmosa shkresën për çrregjistrim nga KQZ, është vullneti i qytetarëve për zgjedhje të ndershme ” u shpreh Duka.
Ndërsa aleati tjetër i së djathtës, Dashamir Shehi tha se “shqiptarët duhet ta kuptojnë se ky është reagimi i fundit. Ne kemi plan të qëndrojnë në funksion të ndryshimit të gjendjes. Ky nuk është vendim vetëm i Bashës, u mor në mënyrë kolegjiale. Themi se ka ardhur dita për të reaguar në mënyrë aktive”.
