Autoritetet në Emiratet e Bashkuara Arabe janë bërë objekt talljesh në internet pasi u publikua lajmi se të gjithë fituesit e një ceremonie të projektuar për të nxitur barazinë gjinore në vendin e punës ishin burra.
“Më bind që kjo nuk është satirë” ishte komenti në Twitter i një lexuesi, ndërkaq shumë të tjerë shkruajnë se kjo ishte ironi therëse.
Sipas “The Guardian” certifikatat dhe medaljet u dhanë nga Sheik Mohammed bin Rashid al-Maktoum, nënkryetar i Emirateve të Bashkuara Arabe dhe sundimtar i Dubait, në kategoritë e “entitetit më të mirë qeveritar që mbështeste ekuilibrin gjinor”, “autoritetin më të mirë federal që mbështet balancën gjinore” dhe “iniciativa më e mirë e mbështetjes ndaj bilancës gjinore” në një ceremoni të dielën.
Çmimet u fituan nga ministria e financave, autoriteti i statistikave dhe ministria e burimeve njerëzore, të cilat ishin të gjitha të përfaqësuara nga fitues meshkuj.
“Ne jemi krenarë për suksesin e grave të Emirateve dhe roli i tyre është thelbësor për të formuar të ardhmen e vendit”, thuhej nga zyra zyrtare e medias në Dubai. “Bilanci gjinor është bërë një shtyllë në institucionet tona qeveritare”.
Një studim i Programit të Zhvillimit të Kombeve të Bashkuara nga viti 2018 zbuloi se Emiratet e Bashkuara Arabe ishte vendi i Gjirit që renditej më i larti për barazinë gjinore dhe kishte bërë përparim të dukshëm.
Raporti gjeti se deri në vitin 2015, 135,000 gra emirate morën pjesë në tregun e punës, krahasuar me vetëm 1,000 në vitin 1975.
Megjithatë, sipas grupeve të të drejtave, diskriminimi gjinor është ende një problem i ngulitur në të gjithë Emiratet e Bashkuara Arabe, veçanërisht në sistemin ligjor, i cili i jep përparësi burrave në çështjet e statusit familjar dhe personal, siç është martesa, divorci dhe kujdesi për fëmijët. Ligji i Emirateve të Bashkuara gjithashtu lejon dhunën në familje për aq kohë sa sulmi nuk i tejkalon kufijtë e përcaktuar nga ligji Islam./E.M
