Kryetarët e 7 partive të vogla, deputetë në Kuvend, Zef Shtjefni, Kostaq Papa, Selami Jenisheri, Adriatik Alimadhi, Krenar Rryçi, Kujtim Gjuzi dhe Vasil Sterjovski nga pakica maqedonase i kanë dorëzuar një kërkesë Kuvendit të Shqipërisë ku shpalosin propozimet e tyre për ndryshimet në Kodin Zgjedhor.
Një nga kërkesat kryesore janë listat e hapura, një pikë e përbashkët kjo me kërkesat e grupeve të tjera opozitare në parlament. Por grupet ndahen përsa i përket koalicioneve parazgjedhore të cilat kërkojnë që të mbeten.
“Ndalimi i koalicioneve ndalon rrotacionin politik në Shqipëri” tha Zef Shtjefni.
Depolitizimi i administratës zgjedhore, votimin e emigrantëve, mos financimi i partive nga buxheti i shtetit janë disa nga kërkesat e tjera të grupit të deputetëve.
“Marrëveshja në Këshillin Politik duhet që të rishikohet. Me rishikimin e Kodit minoritetet të kenë vendet e garantuara në Kuvendin e Shqipërisë. Nuk mund ti mbrojnë më mirë pakicat se vetë përfaqësuesit e minoriteteve” kërkoi Vasil Sterjovski nga pakica maqedonase në Shqipëri.
Deputeti Kujtim Gjuzi tha se zgjedhjet duhet të organizohen nga një qeveri tranzitore me akademikë pa e cënuar mandatin e PS-së
“Ne kemi depozituar në Kryesinë e Kuvendit projektin tonë me propozime që do të kthehet në nismë ligjore. Shtatë parti politike kërkojnë ndryshime radikale, numërimin elektronik, maturimin e votës në shkallës kombëtare në rajone, këtu jemi të hapur, parlamenti ka nevojë për pakicat gjuhësore kombëtare.
Në shohim që kryeministri vjen në zyrat e kuvendit për të takuar përfaqësues të veçantë, ne kemi objeksionet tona. Rama mund ti bëjë takimet në kryeministri apo ambient tjetër të hapura, por kurrsesi në Kryesinë e Kuvendit, vetëm një personalitet ka tagër, ai është kryetari i Kuvendit. Vetëm Kuvendi do të ketë tagrin. Ne kemi propozuar 7 pika. Si mund të vijë PD-LSI dhe të rifutet në politikë, qeveria transitore me akademikë duhet të organizojë zgjedhjet, pa e cenuar mandatin PS-së” tha ai.
Ndër të tjera, këta deputetë kërkojnë edhe ndryshime kushtetuese të thella. Ata propozojnë zhvillimin e një referendumi për të vendosur ose jo zgjedhjen e presidentit nga populli për ta kthyer Shqipërinë në Republikë gjysmë presidenciale, dhe rritjen me 10 deputetë të Kuvendit, të cilët do të përfaqësojnë minoritetet dhe pakicat kombëtare. /Opinion.al
