“Dua Lipa është tani mbretëresha e popit dhe një nga këngëtaret më të dëgjuara në të gjithë botën”, kështu e cilëson revista “Elle” këngëtaren shqiptare.
Revista prestigjoze ka realizuar një intervistë, e cila nis në shtëpinë ku Dua jeton me qira dhe po përgatit mëngjesin për gazetaren. Teksa gatuan, Dua tregon vështirësitë me të cilat janë përballur prindërit e saj kur jetonin në Londër.
“Para luftës, nëna ime studionte juridik. Babai im bënte muzikë dhe studionte për stomatologji. Ndërsa në Londër prindërit e mi punonin në lokale dhe në kafene, ndërsa babai njëherësh shkonte dhe në universitet. Një nga gjërat që mësova nga prindërit e mi është mënyra si u përshtatën me rrethanat, pavarësisht gjithçkaje”, shprehet Dua.
Ajo kujton se në moshën 11-vjeçare u kthye në Kosovë me prindërit, pasi babait, Dukagjin Lipës, i ofruan një punë që s’mund ta refuzonte.
“Isha vajza që flisja shqip me theks anglisht. Nuk isha shumë e zonja në mësime, sepse të gjithë në Kosovë mësonin kimi dhe algjebër, ndërsa unë isha akoma te thyesat. Ata fëmijë ishin shumë të zgjuar”.
E pyetur për Kosovën, Dua shprehet:
“Kosova më ka përcaktuar si njeri. Ne kemi një sens të çmendur komuniteti. Njerëzit i dinë punët e tua përpara se ti t’i marrësh vesh, por gjithmonë më kanë treguar shumë dashuri. Dikush më tha në një intervistë: ‘Ti ke etikën e punës së emigrantëve’, por është më shumë sesa kaq, kur ti do që të të marrin seriozisht. Të paragjykojnë po të jesh nga Kosova apo Shqipëria. Në filma, çdo shqiptar është në mafie. Po përpiqemi të ndryshojmë atë që njerëzit mendojnë për vendin tonë”, tha ndër të tjera Dua. /Opinion.al
