Këngëtarja me origjinë kosovare, Dua Lipa, do të performojë nesër në Prishtinë.
Në konferencën e mbajtur në kryeqytetin e Kosovës ajo tregoi detajet e koncertit por edhe përshtypjet e saj pas arritjes në Prishtinë pas katër viteve mungesë.
Këngëtarja është pritur në aeroportin ndërkombëtar “Adem Jashari” nga familjarët e saj.
Paratë për shitjen e biletave do të shkojnë për bamirësi në Kosovë, me ç`rast mjetet e grumbulluara shkojnë në fondacionin bamirës “Sunny Hill”, të krijuar nga Dua Lipa.
Dua Lipa ka thënë se pavarësisht që Kosova ka nevojë për shumë gjëra të tjera e jo vetëm për muzikë, ajo do të mundohet të bëjë përpjekje që të ofrojë sa më shumë me artin e saj.
“Nuk kam pas qejf me shit bileta as me marr pare për vete, por disi me u mundu me i përkrah të rinjtë e Prishtinës dhe Kosovës në art dhe kulturë” ka thënë ajo.
Në fund këngëtarja, u shpreh se e kishte marrë malli për ushqimin tradicional piten.
E lindur në Londër, Dua Lipa deri më tani është cilësuar si pop ylli në ngritje.
