Dy persona kanë prangat e Policisë së Durrësit dhe një tjetër është ndaluar, pasi dyshohet se është autor i 8 vjedhjeve, teksa janë sekuestruar drogë dhe armë.
Në pranga ka rënë Dejvid Karaboja 29 vjeç, banues në Durrës, të cili gjatë kontrollit fizik, në çantën e dorës iu gjetën dhe u sekuestruan në cilësinë e provës materiale një sasi dozash me lëndë narkotike heroinë dhe kokainë, si dhe një shumë parash, të cilat dyshohet se ky shtetas i ka përfituar nga shitja e lëndës narkotike.
Ndërkohë policia ka vënë në pranga dhe 37-vjeçarin Denis Kapedani, të cilit i është gjetur drogë. Po ashtu Kapedani akuzohet se është autori i vjedhjes së disa vepra arti me vlera historike.
Atij gjatë një kontrolli më të imtësishëm i është gjetur një grirëse hashashi, krehër arme dhe municion luftarak, armë të ftohta, thikë dhe shpatë, uniforma policie me simbolet e Policisë së Shtetit, 1 tavolinë pokeri, çipsa dhe 14 makineta për lojëra fati.
Është ndaluar dhe një 19-vjeçar që akuzohet se është autori i 8 vjedhjeve të ndodhur gjatë muajit Qershor dhe Korrik në qytetin e Durrësit.
