Policia e Shkodrës ka sekuestruar rreth 151 kilogramë drogë duke vënë në pranga tre persona, një nga Shkodra dhe dy nga Mali i Zi. Policia e Shtetit dha sot informacionin zyrtar për drogën e zbuluar dje mes Shqipërisë e Malit të Zi.
“U finalizua me sukses operacioni policor “Bardhaj”, ku u kapën dhe u arrestuan në flagrancë shtetasit: Kristjan Pali, 25 vjeç, banues në Shkodër; Radovan Bulajic 42 vjeç, banues në Danilograd, Mali i Zi; Marko Rasovic, 36 vjeç, banues në Nikshiq, Mali i Zi. Kapja dhe arrestimi i shtetasve të mësipërm u bë pasi nga kontrolli në brendësi të mjetit tip furgon “Volkswagen” me targa malazeze, i cili ishte futur në Shqipëri nëpërmjet PKK të Hanit të Hotit nga shtetasi R.B, u konstatuan 25 paketime polisteroli, 13 nga të cilat kishin brenda tyre lëndë narkotike të dyshuar “marijuanë” me peshë totale 151 kg, e cila u sekuestrua në cilësinë e provës materiale”, njofton policia.
Gjithashtu në cilësinë e provës materiale janë sekuestruar dy automjete, pesë celularë, 1 palë dylbi dhe një shumë eurosh, ndërsa po vijojnë hetimet për identifikimin dhe kapjen e personave të tjerë të përfshirë në këtë aktivitet kriminal./Opinion.al
