Një tjetër sasi e madhe lënde narkotike është bllokuar nga policia. Në qytetin e Sarandës policia ka bllokuar një furgon që mbante plot 325 kg kanabis. Në pranga ka përfunduar Afrim Çifliku, 43 vjeç, banues në fshatin Lapardha të Berat.
Droga është sekuestruar gjatë operacionit të koduar “Ndryshe”, ndërsa policia kishte informacion për lëvizjen. Bllokimi i 43-vjeçarit është bërë në fshatin Vrion të Delvinës. Pas kontrollit në automjetin tip “Ford-furgon” me targë AA706JR ishte fshehur lënda narkotike.
Droga ishte e ndarë në 61 pako, në formë thasësh ngjyrë gri dhe të zezë. Policia dyshon se destinacioni i lëndës narkotike ishte shteti grek. Ndërkohë po punohet për zbulimin, identifikimin dhe arrestimin e bashkëpunëtorëve të tjerë të përfshirë në këtë aktivitet kriminal.
